Ipinakita ng dalawang aso ang pagmamalasakit nila sa kapuwa nila aso na nahagip ng sasakyan sa China. Dahil walang tao na tumulong sa kanila upang maialis sa gitna ng kalye ang sugatang aso, ang dalawang hero dog na ang gumawa ng paraan.
Sa ulat ng GMA Integrated Newsfeed, makikita sa CCTV footage ang isang aso na nakahandusay sa gitna ng daan at hindi makatayo matapos umanong mahagip at takbuhan ng sasakyan sa Jiangsu, China.
Maya-maya lang, dalawang aso ang lumapit sa sugatang aso at tila tinatawag nila ang atensyon ng mga dumadaang motorista. Gayunman, iniiwasan lang sila ng mga motorista pero walang tao na bumaba para man lang itabi ang sugatang aso upang hindi na masagasaan.
Hanggang sa gawin ng dalawang aso ang hindi inaasahan. Hinatak nila sa pamamagitan ng pagkagat ang asong sugatan upang maialis sa gitna ng kalsada at dinala na gilid ng daan.
Hindi nagtagal, nakita na ang may-ari ang sugatan niyang aso at dinala niya sa pagamutan. Sa kabutihang-palad, nakaligtas ang aso at patuloy na nagpapagaling.
Ayon sa furparent na si Mr. Xue, mga asong-kalye ang dalawang aso na sumaklolo sa kaniyang alaga, na isa rin palang dating asong-kalye.
Anim na buwan pa lang ang nakalilipas mula nang ampunin niya ang kaniyang alaga. Ngayon, plano na rin niyang ampunin ang dalawang hero dog.– FRJ, GMA Integrated News